CAMPUS TECNOLÓXICO DE VERÁN
Universidade de Santiago de Compostela
Escola Politécnica Superior de Enxeñaría Campus de Lugo

Tecnoloxías aplicadas á sustentabilidade e a conservación do planeta. Na edición 2025, o estudantado embarcarase nunha misión global para salvar a Terra, participando en talleres deseñados para abordar os maiores retos ambientais da actualidade como a perda de biodiversidade e a contaminación.

As persoas participantes deste campus temático explorarán a intersección entre a tecnoloxía e o medio ambiente, descubrindo como as innovacións poden ser claves para reverter os danos ocasionados pola actividade humana. Ao longo desta viaxe, o alumnado aprenderá sobre enerxías renovables, o uso da intelixencia artificial na conservación e como as tecnoloxías emerxentes axudan a monitorizar e protexer os ecosistemas de todo o planeta. Nos distintos talleres interactivos, o estudantado desenvolverá habilidades en programación de sistemas de vixilancia ambiental, deseño de drons para a reforestación, creación de solucións tecnolóxicas para reducir a pegada de carbono e análise de datos sobre o cambio climático. Mediante actividades prácticas e proxectos colaborativos, as persoas participantes non só entenderán a importancia das ciencias e a tecnoloxía na protección da Terra, senón que tamén aplicarán os seus coñecementos para crear solucións concretas.

En Play Code Academy apostamos por unha formación baseada no descubrimento do mundo que rodea ao alumnado a través da experimentación e do modelo de proba e erro.